160 ka tawo nasikop atol sa operasyon sa kapolisan sa Talisay
CEBU, Philippines — Niabot ngadto sa 160 ka tawo ang nadakpan sa gihimong tulo ka adlaw nga Simultaneous Anti-Criminality Law Enforcement Operation (SACLEO) sa kapolisan sa Dakbayan sa Talisay.
Ang operasyon gihimo pinangulohan ni Police Major Gerard Ace Pelare aron ipatuman ang nagkadaiyang balaod ingon man guidelines sa Inter-Agency Task Force (IATF).
Si Pelare nagkanayon nga pagpakita kini sa katawhan nga ang kapolisan seryoso sa ilang trabaho ug kinahanglan ang tanan mosunod sa mga lagda o balaod.
Ang kapolisan nakapahigayon kini og 83 ka operasyon diha sa nagkadaiyang barangay sa siyudad.
Adunay 14 ka tawo kinsa nalambigita sa ilegal nga drugas ang nasikop, 13 sa ilegal nga sugal, walo usab ka tawo nga adunay warrant of arrest ang nasikop ug 117 ang nadakpan sa kalapasan sa uban pang lagda sa balaod.
Walo usab ka tawo ang nisurender sa ilang armas nga walay mga lisensiya.
Ang mga nadakpan natingkagol kini sa detention cell samtang ang uban giisyuhan og citation ticket. Adunay pipila ka dinakpan ang nakabayad og multa apan uban kanila napasakaan og kaso.
“We will arrest and account for criminals in the city, we will not be deterred in our mission to protect the Talisaynons despite the challenges of the pandemic, matud ni Pelare. /BDB (BANATNEWS)
- Latest
