Talisaynon nisumbong ni Gullas kay wala makolekta ilang basura

CEBU, Philippines — Ang mga residente sa Dakbayan sa Talisay nipadangat og mga reklamo ngadto kang Mayor Gerald Anthony “Samsam” Gullas Jr. kabahin sa ilang mga basura nga wala makuha sulod na sa pipila ka adlaw.

Si Gullas nagtuo nga tungod kini sa pagtumaw sa pandemiya diin wala na matuman ang pipila ka rota sa pagkolekta sa basura. Nasayran, nga ang siyudad nikuha kini og pribadong kompaniya aron maoy mohipos sa mga basura samtang ang mga barangay mohimo sa ilang bahin pinaagi sa pagtubag sa ubang suliran sa paglimpiyo.

Si Gullas niawhag sa mga residente sa siyudad nga mahimong makatawag direkta sa mga numero sa cellphone nga 09567880955 ug 09311510243 aron matubag dayon ang pagkolekta sa ilang basura.

Sayo pa, si Edwin Nierves, pangulo sa City Solid Waste Management Office (CSWMO) nanawagan nga hingusgan ang pagdakop sa mga tawo nga magpataka og labay sa ilang mga basura.

Iyang gidasig ang opisyales sa barangay sa paghimo niini aron madisiplina gyud ang tanan. /BDB (BANATNEWS)