Gullas nisusi sa mga sementeryo sa Talisay

CEBU, Philippines — Si Mayor Gerald Anthony “Samsam” Gullas Jr. sa Dakbayan sa Talisay nilibot diha sa tanang sementeryo sa siyudad.

Kini aron iyang personal nga makita ang sitwasyon ilabi na nga nagsingabot ang adlaw sa mga kalag ug Santos.

Uban ni Gullas si Police Major Gerard Ace Pelare, hepe sa Talisay City Police Station ug Jonathan Tumulak, hepe sa City of Talisay- Traffic Operations and Development Authority.

Matud ni Gullas nga aduna nay mga tawo nga nibisita sa lubong ilang mga minahal sa kinabuhi apan diyotay pa kini.

Ang mga sementeryo sa siyudad siradohan kini gikan sa Oktubre 29 hangtud sa Nobiyembre 4 aron malikayan ang tapok-tapok ug dili mokatap ang virus.

Si Pelare nipakatap kini og personnel diha sa mga sementeryo aron pagsiguro nga natuman ang safety health protocols.

Sa laing bahin, ang mga residente sa Lungsod sa Minglanilla gipahimangnoan sa kapolisan nga magsul-ob ug facemask ug face shields aron makasulod  diha sa mga sementeryo.

Kini ang gibutyag ni Police Master Sergeant Christopher Cesa sa Minglanilla Police Station.

Matud ni Cesa nga aduna na silay gipahimutang nga mga police assistance centers sa lima ka sementeryo sa Poblacion Ward sugod sa nilabayng semana aron sa pagsiguro nga nasunod ang health safety protocols. –Rowena D. Capistrano/BDB (BANATNEWS)