Tulo nieskapo, usa napatay

CEBU, Philippines — Duha sa tulo ka mga piniriso sa Police Station 4 sa Cebu City Police Office nga mieskapo ang natultulan sa kapulisan  apan usa ray nadakpan pagbalik samtang ang usa napusilan patay sa mga polis human gikatahong nisukol sa mga otoridad.

Ang mga mieskapo mao sila si Roberto Ludong alyas “BadMax”, Oliver Basak ug Nico Baylosis nga pulos dunay kasong kalapasan sa Section 5 sa Republic Act 9165 kun Comprehensive Dangerous Drugs Act of 2002.

Usa ka manhunt operation ang gihimo sa kapulisan ug nahibaw-an nga nagtago-tago sila si Ludong ug Basak sa Bo. Luz. Si Ludong maoy gitumbok nga nangulo sa grupo sa ilang pageskapo.

Natultolan silang duha sa Sitio San Vicenter sa maong barangay, si Basak mitahan dayon sa mga polis apan si Ludong gikatahong mibunot og armas hinungdan  nga kini napusilan nga miresulta sa kamatayon niini. Matud sa hepe sa Police Station 4 Major Dindo Juanito Alaras, nahibaw-an nila kun asa nagtago-tago ang mga nieskapo pinaagi sa tabang sa komunidad nga nagpadala og impormasyon kanila. “Ang nakanindot ra gyud sa cooperation sa community paspas ang ilang feedback nato sa mga inquiries, especially kining gikuyugan ani, kini silang duha is murag sakit na sa ulo sa kani nga neighborhood diri sa Barangay Luz. So, the moment nga nakabalo sila nga kini on the loose so naa tay daghang ma consider as mata nato diri para makita nato ang movement kung asa man gani sila (and) that eventually lead sa pag-aresto sa usa, ang isa unfortunately niresulta gyud ta ingon ani nga maduguon,” sigon ni Alaras. Ang pag-eskapo nahitabo kagahapon sa kaadlawon samtang ang nagbunok ang kusog nga uwan ug ang mga polis niatiman sa mga nagreklamong mga Korean nationals.

Paghawa matud pa sa mga Koreano  nabantayan nga wala na diha sa karsel ang tulo ug nasuta nga gigabas nila ang kabilya sa luyong bahin sa karsel ug didto miagi sa luyo.

“Ang build atong isa dako man to og lawas ang isa kato si Nico kung nagtinabangay to silang tulo makaya ra gyud nila, igo raman mahiwi nga masuksok ang ulo, mao ra toy ilang gibuhat, mogawas na gani ang ulo mogawas na pud ang lawas,” dugang ni Alaras.

Gisusi karon kun diin gikan og gabas sa puthaw ang mga nakaeskapo apan nagduda silang gikan kini sa ilang mga dalaw nga maghatud og pagkaon nga wala makita sa mga polis nga nag-inspeksyon sa ilang dad-ong pagkaon.

Si Cebu City Police Office Director Police Colonel Josefino Ligan miingon nga si Ludong maisip nga hardcore criminal kay matud pa nalambigit sab kini sa kaso sa pagpatay, tulis ug akyat bahay. “A short background aning si BadMax wala ni klarong address, in fact atong nasayran atong bulan sa Agosto siya pud ang responsable sa pagpang-akyat bahay diha sa Carreta nga katong tigulang nga iyaha pud gipatay. So kining tawhana hardcore ni, dili lang illegal drugs, apil ni robbery, akyat bahay,” asoy ni Ligan. 

Sa pagkutlo ning maong balita  padayong gipangita si Nico Baylosis.

Tungod sa maong hitabo, gipaubos sa imbestigasyon ang tanang polis nga nag-duty anang tungora ug posible silang makasohan og administratiba tungod sa nahitabo.

Sa pikas bahin, si Cebu Archbishop Jose Palma niawhag sa mga Person Deprive of Liberty nga dili unta sila mawad-an og paglaum bisan sa sitwasyong ilang gikahimutangan karon.

Kini ang tubag sa arsobispo human adunay upat ka mga priso sa Mabolo Police Station ang nihimo ug pagpuga diin usa niini ang nakalas human nisukol sa kapulisan ug usa ang nasikop.

Matud pa sa Arsobispo sayod man gyud kita unsa kalisod ang mahimong PDLs apan mas maayong mokooperar sa mga nagdumala sa mga prisohan.

Giawhag usab ni Palma ang mga banay nga adunay sakop nga bilanggo pagahin og oras pagbisita kanila aron maminosan ang ilang kamingaw ug palig-unon ang ilang kaugalingon. —Rowena D. Capistrano/IBM (BANATNEWS)