Ambulansiya vs bus, siyam naangol
CEBU, Philippines — Siyam ka tawo ang nangaangol nga mga sakay sa ambulansiya ug sa Ceres bus nga nabanggaan niini diha sa dalan De Vera eskina General Maxilom Avenue sa Barangay Carreta sa siyudad sa Sugbo kagahapon sa hapon.
Sa pasiunang imbestigasyon ni Police Staff Sargent Ryan Perez traffic imbestigador sa Mabolo Police Station go signal ang dalan nga gisubay sa maong bus apan pagabot sa eskina sa maong dalan kalit nibangga ang ambulasya sa Chong Hua Hospital nga nagkarga og pasyente ug ambulance personnel niini.
Tungod sa kakusog sa pagbangga, nabungkag ang atubangang bahin sa ambulansya ug nabalandra ang mga sakay niini sa sud lakip na ang drayber ug ang pasyenteng ilang gidala.
Ang unom ka mga sakay sa maong ambulansya nakaangkon og mga bun-og sa nagkadaiyang parte sa lawas tungod sa kusog nga pagbangga.
Dali silang gidala sa tambalanan sa mirespondeng mga sakop sa emergency medical service (EMS) sa siyudad.
Ang drayber sa maong bus nga si Benedict Caldozo miiingon nakurat nalang kini dihang kalit nisampak sa iyang bus ang maong emergency vehicle.
Sumala pa niya uwahi na siya nakadungog sa siren sa ambulansya ug nabangga na dayon kini sa iyang bus.
Atol ning pagsuwat sa balita, wa pay nahatag nga dugang impormasyon ang imbestigador bahin sa insidente. /IBM (BANATNEWS)
- Latest
