Ayuda sa mga vendors gihatag na sa siyudad
CEBU, Philippines — Nanghatag na og ayuda kagahapon ang Siyudad sa Sugbo sa mga candle ug flower vendors sa mga sam-ang sa siyudad nga apektado sa pagsira unya sa mga menteryo gikan sa Oktubre 29 hangtud sa Nobyembre 4.
Kini maoy gibutyag ni Cebu City Mayor Edgardo Labella dihang nahinabi sa mga tigbalita.
“Mga vendors, candle vendors, flower vendors nagsigi na gyud sila og tawag nato kanus-a kuno ang ayuda, so manghatag ta unahon nato ang Carreta, pero sa akong tan-awon mura wala man sad gyud sila ingon nga wala’y benta kay daghna naman gasuroy sa menteryo but since we have promised that we will give them assistance kay tingali naapektuhan gyud ilang sales ato ng ihatag”, sigon ni Mayor Labella.
Nasayran moabot sa 400 ka mga candle ug flower vendors ang apektado niini hinungdan nga silang tanan hatagan og ayuda sa siyudad nga 15 kilos nga bugas ug mga de lata.
Gipatuman ang pagsira sa mga sam-ang panahon sa kalag-kalag aron malikayan ang pagdasok sa mga tawo nga posibleng hinungdan sa pagkatap sa covid-19. /MEL (BANATNEWS)
- Latest