Plastik nga basura bugtian og bugas
CEBU, Philippines — Nagplano ang kagamhanan sa Dakbayan sa Sugbo nga bugtian og bugas ang mga plastic nga basura nga makuha sa kadalanan.
Gitahasan na ni Cebu City Mayor Edgardo Labella ang Cebu City Environment and Natural Resources Office (CCENRO) nga modumala sa maong programa.
Ang matigom nga plastik mahimong ma-recycle aron himoon og bangko, lamesa ug uban pa.
Mitumaw ang maong plano human sa panagtigum tali ni Mayor Labella og sa mga tag-iya og pribadong kompaniya nga naggama og plastic.
Nasayran nga usa ang plastic sa mga hinungdan nga nabara ang mga sapa ug agianan sa tubig nga hinungdan sa mga pagbaha. Mao kini ang rason nga gitigom ni Labella ang mga kompaniya ilabi na kadtong manufacturer og bottled water.
Nahisgotan usab sa tigom ang pagbutang og daghang sudlanan sa mga basura nga plastik.
Mopadangat usab sila og komunikasyon sa Department of Education (DepEd) aron iapil og tudlo sa mga estudyante ang saktong paglabay sa ilang basura. /MEL (BANATNEWS)
- Latest
