878 na lang kaso sa COVID-19 sa Central Visayas
CEBU, Philippines — Ang aktibong kaso sa COVID-19 sa Central Visayas anaa na lang sa 878 ang gidaghanon.
Base sa Oktubre 20, 2020 nga datos sa Department of Health (DOH)-7 nadugangan og 49 ka bag-ong kaso ang region-7 diin 10 niini gikan sa Cebu City, usa sa Lapu-Lapu City, upat sa Mandaue City ug 34 sa Probinsiya sa Sugbo.
Samtang ang recoveries anaa na sa 19,679 lakip niini ang 87 nga nadugang.
Samtang nikabat ngadto sa 1,317 ang kinatibuk-ang namatay lakip na niini ang lima nga nadugang.
Ang cumulative total sa COVID-19 lukop Central Visayas nikabat ngadto sa 21, 874.
Nunot niini, ang kinatibuk-ang namatay sa mga dakbayan sa Sugbo, Mandaue ug Lapu-Lapu anaa sa 678, 148, ug 103 niadtong Oktubre 20, 2020.
Sa Cebu City adunay 10 ka bag-ong kaso ang natala diin nikabat ngadto sa 10,180 ang kinatibuk-ang kaso ug 209 na lang ang active cases.
Ang total recoveries naa sa 9,293 lakip na niini ang pito ka bag-ong nadugang.
Ang Mandaue City adunay 2,527 ka kinatibuk-ang kaso ug 83 na lang ang active cases lakip niini ang upat nga bag-ong kaso.
Nikabat ngadto sa 2,296 ang kinatibuk-ang recoveries lakip na niini ang lima nga nadugang.
Samtang ang Lapu-Lapu City adunay 2,428 ka kinatibuk-ang kaso diin 120 na lang niini ang active cases lakip niini ang usa nga nadugang ug nikabat ngadto sa 2,205 ang recoveries. (BANAT NEWS)
- Latest
