Mayor Gullas miisyu og EO nga dakpon ang mga sabaan

CEBU, Philippines — Dakpon na ang mga tawo nga magsaba-saba nga makabalda sa mga tinun-an ug mga trabahante nga nag work from home sa Dakbayan sa Talisay.

Kini human si Mayor Gerald Anthony “Samsam” Gullas Jr. niluwat og Executive Order (EO) sa pagban sa videoke ug karaoke ingon man sa uban pang klase sa pagsaba-saba.

Gituyo kini aron matabangan ang kabataan nga dili mabalda sa ilang klase diha sa ilang mga pinuy-anan ingon man sa mga trabahante nga nag work from home.

Ubos sa maong executive order , Lunes hangtud sa Sabado wala gitugot ang maong pagsaba-saba gikan sa alas 7 sa buntag hangtud sa alas 6 sa gabii.

Nihangyo si Gullas nga unta motabang ug mosunod sa lagda ang katawhan aron malipay ang mga silingan.

Samtang si Police Major Gerard Ace Pelare, pangu sa Talisay City Police Station nimando sa iyang mga sakop nga mosuroy sa nga lugar sa pagpangita sa mga sabaan.

Matud pa niya nga mahimo gyud nga dakpon ang makalapas sa kamanduan ug subay niini giawhag niya ang si bisan kinsa nga motawag gilayon sa ilang buhatan kun ugaling dunay mga silingan nga grabe ang pagsaba-saba. (BANAT NEWS)