CSBT nangandam na sa pagdagsa sa mga pasahero

CEBU, Philippines —  ang pagpangandam sa Cebu South Bus Terminal (CSBT) nonot sa gipaabot nga pagdagsa sa mga pasahero subay sa kasaulogan sa kalag-kalag.

Suma pa ni Carmen Quijano ang manager sa CSBT nga padayon ang ilang meeting alang sa mga preparasyon sa kalag-kalag sanglit dili man nila matag-an kun gamay ra o daghan ang mga pasahero nga mouli sa tagsa-tagsa nila ka probinsiya.

“So dunay preparation ta mga guards ug sa CSU, try nako og check sad ang atong guards kung unsa ilang recommendation so I can ask sa atong Gobernador what to do ug unsay additonal pangayuon sa CSU”, sigon ni Quijano.

Gitataw ni Quijano nga istrikto gihapon nila nga ipatuman ang health protocols diha sa terminal sama sa paghugas sa kamot, pag-check sa body temperature, pagsul-ob og face mask ug face shield ilabi na nga duna sila’y palisiya nga “no facemask, no face shield, no entry” ingon man ang social distancing.

Hangyo ni Quijano sa katawhan nga dili masuko tungod kay lahi na ang sitwasyon karon, kun kaniadto ang terminal moka-akomodar og 1000 ngadto na sa 2000 ka pasahero apan karon naa nalang kini sa 750.

Kaniadto ang pasahero nga modagsa sa South Bus Terminal moabot sa 40,000 apan karon napanglantawan nila nga naa nalang sa 10,000. Awhag sab ni Quijano sa mga pasahero nga mosulod gyud sa terminal aron masunod ang health protocols ug dili mag-atang sa gawas aron didto mosakay aron malikayan ang pagkatap sa COVID-19.

Segun usab ni Quijano nga gamay nalang ang mga bus nga naa sa terminal tungod sa sitwasyon karon hinoon masaligon ra si Quijano nga ma-akomodar ra ang tanang pasahero. (BANAT NEWS)