Way kalabotan ang modules sa mga kaso sa paghikog

CEBU, Philippines — Giklaro ni Department of Education’s Central Visayas Regional Director Salustiano Jimenez nga walay kalabotan sa printed modules nga gipanghatag sa mga distance learners ang mga nabalitang kaso sa paghikog sa mga tinun-an sa rehiyon. Adunay upat ka mga paghikog sa mga tinun-an ang natala sa rehiyon nga nakatawag sa atensyon sa DepEd-VII gikan pagsugod sa klase sa binag-ong pamaagi.

Milihok dayon ang DepEd pagkasayod niini nga dunay estudyanteng naghikog gikan sa Toledo, Alcoy, Guihungan ug Bohol. Ang sa Bohol giingong estudyante sa kolehiyo ug dili na sakop sa basic education o DepEd. Base sa ilang imbestigasyon dili tungod sa modules ang hinungdan kondili lahi nga rason apan wala na siya mohatag pa og lawom nga eksplinasyon agi og pagtahod sa mga kabanay.

Kaning maong mga hitaboa ilaha nang gipahibalo sa ilang ulohang buhatan.

Kagahapong adlawa ang DepEd Central Office mipagawas og opisyal nga pamahayag base sa nahipos ug giipon nga mga impormasyon bahin sa nahitabo sa maong mga tinun-an ug mipadayag sab sila og dakong kasubo sa nahitabo ug miduyog sa kasub-anan sa mga pamilya sa mga bata.

Tungod niini, giawhag sa DepEd ang tanan nga hunongon na kining pagkonektar sa modules sa mga paghikog.

“So, we want to call it to stop connecting with modules or distance learning. We have already received reports from the authority, be statements of families, and initial investigation of cases and none of the incident determines distance learning as their primary cause,” panawagan pa sa ahensiya.

Gipasabot niya nga ang mga magtutudlo ug mga tinun-an uban sa mga opisyales sa DepEd anaa kanunay para maminaw bahin sa mga leksyon nga dili masabtan.

“Tinuod man sad gyud na dili lang unta nato e-attach and kaning sa modules. Kung mao nay mahitabo, unsaon nato sa pag-prepare sa atong mga bata to be strong whenever there are challenges. Samot nag mo-college and mokuha og kurso nga medicine, law, unsaon na lang pag-agwanta sa mga bata?” matud ni Jimenez.

Ang paghikog usa ka sensitibo ug komplikadong isyu. Mao nga mipasidaan ang DepEd sa publiko aning magpataka og konektar sa learning modules sa mga kaso sa paghikog sa mga tinun-an ug mas maayong palig-unon nalang ang relasyon sud sa pamilya. The Freeman/IBM