Aplikante sa MSME gipahunong una
CEBU, Philippines — Gipahunong una sa buhatan ni Bise Gobernador Hilario Davide III ang pagdawat og mga aplikante alang sa Sugbo Negosyo Program sa Probinsya sa Sugbo sugod kagahapong adlawa Oktubre 19, 2020.
Bisan “walk-in” o online, di na modawat pa ang buhatan sa bise gobernador. Si Atty Ramil Abing ang chief of staff sa buhatan sa bise gobernador nagkanayon nga ubay-ubay ang mga ni-apply sa maong programa.
Interesado sila nga mo-avail sa programa sa micro-small medium enterprise (MSMEs) apan tungod sa kadaghan kuwangon ang pundo nga gitagana sa ilang buhatan. “As of now, we have more than 2,000 applicants. Pending review of their qualifications, we stop receiving applications starting today because ma-exceed mi sa VGO (Vice Governor’s Office) budget nga P15 million,” matud ni Abing.
Ang mga personnel sa buhatan sa bise gobernador nilibot sa nagkadaiyang mga lungsod ug dakbayan sa probinsya alang sa pagdawat sa mga aplikante.
Gibahin bahin sa VGO ang aplikasyon ug nipatuman og first come first serve basis. Ang Sugbo Negosyo program usa kini ka programa sa Kapitolyo alang sa mga gusto mag negosyo ug katong mga gagmay nga magpapatigayon nga naapektohan sa pandemya sa coronavirus disease (COVID-19)
Ang maong programa adunay tulo ka kategorya ang “Negosyong Padayonon” isip Category A kon diin P50 mil nga kantidad sa mga materyales ang madawat; (Category B) Produktong Sugbuanon kon diin P20mil usab nga kantidad sa materyales ang madawat ug “Mga Serbisyo ug Ginagmayng Patigayon” ang Category C kon diin P10mil nga kantidad sa materyales ang madawat.
Matud ni Abing kasagaran ni-apply naa sa category C o ang mga ginagmayng patigayon.
Ang gi-set nga schedule sa pagdawat sa mga aplikante kutob sa kataposan sa Oktubre karong tuiga. Ang mga board members gihatagan usab og tag P5milyones nga budget alang sa pagpatuman sa maong programa. /IBM (BANATNEWS)
- Latest