COVID-19 update: Mga kaso padayong nagkagamay

CEBU, Philippines — Nagpadayon ang pagkubos sa gidaghanon sa mga kaso sa Covid-19 sa rehiyon timailhan nga nakab-ot na ang ‘flattened curve’ apan mipasidaan ang Department of Health Central Visayas nga dili gihapon angay mokompiyansa.

Sa Cebu City, 14 ka mga bag-ong kaso ang nadugang sa talaan niini nga karon miabot na tanan og 10,148 kinatibuk-an apan 235 lamang niini ang aktibo o nagpaalim.

Siyam sab ang nadugang sa talaan sa mga nangaayo nga niabot na tanan og 9,236 samtang 677 ra gihapon ang gidaghanon sa mga nakalas.

Ang Lapu-Lapu City nakatala sab og pito ka mga bag-ong kaso ug karon  2,410 ang total cases sa dakbayan apan 102 lang ang active cases samtang 2,206 na ang nangaayo ug 102 ang natala nga nakalas gikan sa pagsugod sa pandemiya hangtud ning panahona.

Samtang ang Siyudad sa Mandaue nakatala og duha ka bag-ong kaso ug duna na sila karoy 2,505 ka mga kaso apan 89 lang ang active cases. Duna say nadugang nga upat nga nangaayo mao  miabot na karon og 2,269 recoveries ang natala sa siyudad.  Nadugangan og usa ang ilang nakalas ug karon 147 na.

Gawas sa maong mga siyudad, dunay nadugang nga 13 sa Bohol, 55 sa Probinsya sa Sugbo ug 12 sa Negros Oriental.

Ang Dakbayan sa Talisay aduna nalang 12 ka aktibong kaso base sa nigawas nga resulta niadtong Oktubre 13 ning tuiga. Walay natala nga bag-ong kaso samtang tulo ang nakarekuber.

Sud sa 22 ka barangay sa Talisay, 12 ka barangay ang wala nay kaso sa Covid-19. Sa kinatibuk-an, 979 ang kaso sa Talisay apan 869 ang nakarekuber ug 98 ang nangamatay.

Sa datos sa DOH-7 niadtong Miyerkules ang Central Visayas dunay 21,619 total cases sa COVID-19 diin 982 niini ang active cases; 19,335 sab ang recoveries ug 1,302 ang deaths.  Le Phyllis Antojado, Gabriel Bonjoc/IBM (BANATNEWS)