Talisay walay gipasiugdahang kalingawan sa pista karon

CEBU, Philippines — Si Mayor Gerald Anthony “Samsam” Gullas Jr. sa Dakbayan sa Talisay nanghinaot nga himuong solemne sa mga Talisaynon ang pagsaulog sa kapistahan sa ilang patrona nga si Santa Teresa de Avila karong tuiga.

Karong adlawa o matag Oktubre 15 kada tuig ang siyudad magsaulog sa kapistahan sa ilang patrona.

Karong tuiga walay mga gitugot nga kalingawan gawas lang sa mga kalihukan sa simbahan tungod sa pandemic.

Si Gullas nagkanayon nga saulogon ang kapistahan diha sa tagsa-tagsa ka panimalay uban sa pangaliya sa kanunayng paggiya ni Santa Teresa de Avila nga balaang magtutudlo sa simbahan.

Matud ni Gullas nga mahimong magluto o mag-order og mga lamiang pagkaon ingon man lechon baboy ang matag panimalay isip pahinungod sa pista apan walay tugotan nga maggawas-gawas.

Ang kapolisan gimandoan usab nga mosita sa mga makalapas sa lagda ubos sa Modified General Community Quarantine. (BANAT NEWS)