Cebu City nakatala og 11 ka kaso, usa sab ang namatay

CEBU, Philippines — Nakatala og 11 ka bag-ong kaso ang Cebu City ug usa ang patay tungod sa novel coronavirus disease base sa datos sa Department of Health Central Visayas niadtong adlaw’ng Domingo. Nianang adlawa, 57 ang nadugang sa mga bag-ong kaso sa Covid-19 sa rehiyon.

Ang kinatibuk-ang gidaghanon sa mga kaso sa siyudad miabot na sa 10,123 apan 356 nalang maoy aktibong mga kaso.

Dunay 17 ka dugang nga nangaayo hinungdan nga niabot na sa 9,091 ang total recoveries sa dakbayan apan 676 na sab ang nakalas human nadugangan og usa.

Sa samang datos sa DOH-7 makita sab ang Mandaue City nakatala og unom ka bag-ong kaso diin ang siyudad dunay 2,497 total cases ug 95 ang active cases. Wala’y additional recoveries nga natala ug nagpabilin sa 2,257 ang ilang recoveries. Ang total deaths nagpabilin sa 145.

Samtang ang Lapu-Lapu nakatala lang og lima ka dugang kaso sa COVID-19.

 Ang total case sa siyudad naa sa 2,402 ug 94 niini ang active cases. Ilang total recoveries nagpabilin sa 2,206 ug ang total deaths nagpabilin sab sa 102.

Sa datos sa DOH-7 niadtong Domingo, ang total number sa COVID-19 cases sa Central Visayas naa sa 21,478 diin 1,127 ang active cases, 19,045 total reported recoveries, ug 1,296 total reported deaths.

Gawas sa tulo ka dagkong siyudad sa Sugbo  adunay natala nga pito ka bag-ong kaso sa Bohol, 14 sa Probinsya sa Sugbo ug upat sa Negros Oriental.

Sa pikas bahin, nagsugod na sa ilang trabaho ang 96 ka mga contact tracers nga bag-ong na-hire sa Dakbayan sa Talisay subay sa awhag sa Department of Interior and Local Government (DILG) sa mga LGUs pag-hire aning mga tawhanan aron makatabang sa pakigbatok sa Covid-19.

Iya sa DILG ang pagsweldo sa mga contact tracers nga nakuha. Si Mayor Gerarld Anthony “Samsam” Gullas Jr. nakigtagbo kanila sa wala pa sila gipang destino sa nagkalain-laing barangay sa siyudad.

Giawhag niya sila nga motabang sa pagpasabot sa mga tawo kalabot sa kamahinungdanon sa pagtuman sa mga safety ug health protocols. Le Phyllis Antojado, Gabriel C. Bonjoc/IBM (BANATNEWS)