Krimen sa Talisay nikunhod karong tuiga

Cebu, Philippines — Mga krimen sa Dakbayan sa Talisay nikunhod karong tuiga kompara sa nilabayng tuig gikan sa buwan sa Enero hangtud sa Septiyembre.

Si Police Major Gerard Ace Pelare, hepe sa Talisay City Police Station nibutyag nga ang pandemiya maoy usa sa mga hinungdan nga nikunhod ang gidaghanon sa krimen tungod kay limitado ang paggawas sa mga tawo.

Base sa talaan sa TCPS karong tuiga sa nahisgutang mga buwan aduna silay 121 nga natalang index crime o crime against property diin sa nilabayng tuig sa susamang mga buwan niabot kini ngadto sa 386.

Samtang ang non-index crime o mga police initiated operation kalabot sa mga special laws sa nahisgutang mga buwan usab sa nilabayng tuig niabot ngadto sa 1,656  ang gidaghanon ug karong tuiga nikunhod kini ngadto sa 941. Ang siyudad adunay kinatibuk-ang crime volume nga 2042 sa nahisgutang mga buwan ug nikunhod karong tuiga ngadto sa 1278.

Ang index crime gilangkuban kini sa murder, homicide, rape, physical injury, theft, robbery ug carnapping.

Samtang ang non-index crime gilangkuban kini sa illegal logging ug gambling, kalapasan sa mga local nga ordinansa sama sa pag-inom diha sa publikong lugar ug reckless imprudence resulting in homicide and physical injuries. (BANAT NEWS)