COVID-19 update: Siquijor nadugangan og duha ka kaso
CEBU, Philippines — Nadugangan na usab og duha ka bag-ong kaso sa coronavirus disease ang Probinsya sa Siquijor ug silang duha parehong mga Locally Stranded Individuals nga gikan sa Sugbo.
Sumala sa Provincial Government of Siquijor Facebook Page, ang bag-ong kaso sa Covid-19 sa Probinsya, usa ka 26-anyos nga lalaki nga taga lungsod sa Enrique Villanueva samtang ang usa 22-anyos nga babaye nga taga lungsod sa Maria.
"Ang atong duha ka patient kay dungan nga niabot atong September 27, 2020 , Sunday, Cebu Port to Larena Port via Lite Shipping," matud sa Probinsya sa Siquijor. Anaa ni sila gikwarantina sa Salagdoong.
Base sa Oktubre 8, 2020 nga bulletin sa Probinsya miabot na og pito ang kinatibuk-ang natala nga kaso sa Covid-19 sa Siquijor, upat niini ang naka-recover na ug tulo usab active case pa.
Sa pikas bahin, 48 usab ang nadugang sa mga bag-ong kaso sa Covid-19 sa tibook Central Visayas base sa Oktubre 8 nga bulletin sa DOH-7.
Ang 13 niini gikan sa Cebu City, unom sa Lapu-Lapu, pito sa Mandaue, 19 sa Probinsya sa Sugbo, usa sa Negros Oriental ug naapil na usab ang duha sa Siquijor.
Anaa na sa 1,128 ang active cases sa Covid-19 sa Central Visayas, 18, 903 ang recoveries human nadugangan og 53 samtang ang namatay anaa sa 1, 293 gikan sa 21, 324 nga cumulative total sa Covid-19 lukop rehiyon.
Sulod sa duha ka adlaw, ang Cebu City, Mandaue City, Lapu-Lapu ug Cebu Province wala makatala og dugang nga nakalas sa maong sakit.
Makita sa datos sa DOH-7 nga niadtong Oktubre 8 ang total deaths sa Cebu City, Mandaue City, Lapu-Lapu City ug Cebu Province nagpabilin sa 675, 143, 102 ug 361 matag usa. Decemay P. Padilla/IBM (BANATNEWS)
- Latest
