Laing senior citizen namatay sa sunog

CEBU, Philippines — Lain na usab senior ang nakalas sa sunog nga miigo diha R. Landon Street, Barangay San Antonio sa Dakbayan sa Sugbo niadtong Lunes sa gabii, ikaduha kini human sa duha ka senior citizens sa Brgy. Mabolo nakalas sab sa sunog niadtong Domingo sa gabii.

Ang nakalas Lunes sa gabii naila nga si Emma Cubillan, 69 anyos, samtang angol ang bana niini si Angelito Cubillan nga anaa karon sa tambalanan human nakaangkon ug 2nd ug 3rd degree burns.

Nadawat sa kabomberohan ang alarma sa sunog alas 11:13 sa gabii nga dihang nasunog ang balay nga giingong gipanag-iya ni Grace Go.

Ang sunog napawong alas-12:22 sa kaadlawon.

Ang Department of Social Welfare and Services (DSWS) nisusi na sa maong panimalay nga nasunogan ilabi na sa mga apektadong namuyo nga nag-abang.

Si Fire Officer 2 Fulbert Navarro sa Fire Arson Investigation Unit sa Cebu City Fire Station mibisita sila og balik sa fire scene aron pagpangita og ebidensiya nga makatudlo sa hinungdan sa sunog.

Sa pagkutlo ning balita wala pa matino ang hinungdan niini sanglit wala pa nila makahinabi ang bana sa nakalas nga anaa pa sa tambalanan.

Ang danyos sa maong sunog naa lang sa P4.3 milyones. Si Navarro miingon nga dunay posibilidad nga mibalik sa agi ang nakalas subay sa posisyon sa patay’ng lawas niini sa fire scene nga nakatalikod sa pultahan.

Gumikan kay sunod-sunod na ang sunog sa siyudad gipanawagan ni Navarro ang katawhan nga dili mokompiyansa bisan og naa pa sila sa balay ug ibton tanang butang nga de kuryente kun di na gamiton.

Maayo sab nga ipasusi ang mga linya sa kuryente sa mga electrician ug dili magbuot-buot, ug kun pananglitan dunay sunog nga mahitabo motawag gyud dayon og bombero ug dili magsalig nga ang silingan nakatawag na.

Dunay hotline number ang kabomberohan nga mahimong tawagan kini mao ang 160 nga mahimong ma-contact 24/7. —Rowena Capistrano/IBM (BANATNEWS)