X-ray operator sa CPA gitulis, gipatay
CEBU, Philippines — Gitulis ug gipusil patay ang usa ka lalaki didto sa Dalan A. Lopez sa Barangay Calamba Syudad sa Sugbo als11:20 Lunes sa gabii.
Ang biktima giila sa kapolisan sa San Nicholas Police Station nga si Jimboy Poqueta Ponce, 22, taga Sitio Bugnay 1, Barangay Labangon nga usa ka x-ray operator sa Cebu Ports Authority (CPA).
Sa imbestigasyong gihimo ni PCpl. Carlo Dumpa Irizari naglakaw ang biktima nga naggunit sa iyang cellphone sa dihang giduol og wala mailhing lalaki ug gitionan kini og pusil dayong kuha sa iyang personal nga gamit.
Giingong misuway pagsukol ang biktima apan gipusil kini duha ka higayon gamit ang wala matinong kalibre sa armas. Naigo kini sa nawong hinungdan sa iyang hinanaling kamatayon.
Ang tulisan dali nga misibat pahilayo sa maong dapit dala ang butang sa biktima. Padayon pa ang man hunt operation sa kapolisan sa tulisan. /IBM (BANATNEWS)
- Latest
