Daghang violators ang gidakop

CEBU, Philippines — Tungod sa pagluag sa mga restriksyon dala niining modified general community quarantine sa tibuok isla sa Sugbo, daghan sab nga mga tawo ang nakalimot na o wala na gyud mosunod sa minimum health protocols.

Dili momenos 20 ka tawo ang gidakop diha sa Dakbayan sa Talisay kagahapon tungod sa wala pagsunod sa health protocols sama sa physical distancing, wala magsuot og facemask, mga tawong naglaroy-laroy lang unya naghubo-hubo pa sa dalan.

Kagahapong adlawa nangabot sab sa siyudad ang mga sakop sa Armadong Kusog sa Nasud nga motabang sa pagbantay human gisugdan na ang misa nobenaryo sa kapistahan ni Sta. Teresa de Avila niadtong Lunes.

Si Police Major Gerard Ace Pelare, pangu sa Talisay City Police Station mipahimangno sa mga taga Talisay nga nagpadayon ang ilang pagpanakop sa mga quarantine violators. Walay kalingawan ang kapistahan apan padayon ang mga kalihukan sa simbahan apan limitado ra ang makasulod ug ubos sa higpit nga pagtuman sa mimimum health protocols.

Sa pikas bahin, sa gihimong Simultaneous Enhanced Management Police Operation (SEMPO) sa kapolisan sa Cordova Police Station gipangulohan sa ilang acting Chief of Police Captain Al-Nico Haman, Cordova Traffic Service niadtong adlaw nga Lunes diin 15 ka tawo ang   nasikop.

Matud pa ni Haman, ang mga nagmaneho nga wala nituman sa minimum health standard ug health protocols naglangkob sa 13 ka mga PUJ Drivers, usa ka taxi driver ug usa ka tricycle driver.

Ubos sa kamanduan sa Department of Transportation Guidelines, ang PUJ dili mopasakay og pasahero nga dili magsul-ob og face mask ug faceshields, ug lakip usab ang pag limit sa gidaghanon sa mosakay aron mapatuman gayud ang social distancing. —Rowena D. Capistano/IBM (BANATNEWS)