Mga sam-ang nangandam sa mga sayong moduaw

CEBU, Philippines — Gihan-ay na sa Dakbayan sa Lapu-Lapu ang mga adlaw nga mahimong makabisita ang mga tawo sa mga sam-ang tungod sirad-an kini sugod karong Oktobre 29 hangtod sa Nobyimbre 4, 2020 subay sa kamandoan nga gipagawas sa Inter-Agency Task Force tungod sa COVID-19 pandemic.

Ang IATF Resolution No. 72 series of 2020 mimando nga dili pasudlan sa mga tawo ang tanang mga sam-ang sa nasud aron malikayan ang pagdasok ug mawala ang physical distancing sa mga tawo diha sa mga sam-ang.

Hinuon mahimong mouna og duaw ang mga tawo sugod sa Oktobre 15 hangtod sa 28, 2020 ug mobalik sa pagbukas Nobyimbre 5 hangtod sa Nobyimbre 16, 2020.

Hinuon dili sakop sa kamandoan kun dunay kinahanglang ilubong basta mosunod lang sa tanang health protocols ang maglubong.

Sa pikas bahin, sugod karong adlaw nga Sabado, Oktubre 10, 2020 hangtod Nobyembre 30, 2020 butangan na og mga polis ang mga sam-ang sa lungsod sa Moalboal.

Ang Municipal Inter-Agency Task Force for the Management of Emerging Infectious Diseases mimando sab nga limitahan lang ngadto sa 200 ka mga tawo matag oras ang tugotang makasulod, usa lang sila ka oras sa sulod ug kinahanglang pagawson.

Usa ray entrada ug usa ra sab ang gawsanan. Abli ang sam-ang sugod alas-6 sa buntag kutob alas-7 sa gabii.

Bukas ang mga sam-ang sa lungsod sa publiko sugod Oktubre 10 hangtod Oktubre 27 ug mobalik Nobyembre 5 hangtod Nobyembre 30, 2020

"Gitugutan ang kabataan ug mga senior citizens nga mobisita sa sementeryo," sumala pa sa LGU apan kinahanglang mosunod sa tanang health protocols. — Le Phyllis F. Antojado/IBM (BANATNEWS)