6 kilong shabu nasakmit gikan sa duha ka tawo

CEBU, Philippines — Kapin sa unom ka kilong gituohang shabu ang nasakmit sa hiniusang operasyon sa Talamban Police Station pinangulohan ni Police Captain Jonathan Taneo ug Pardo Police Station alas 8:30 Lunes sa buntag diha sa Fatima Homes, Barangay Inayawan Syudad sa Sugbo.

Ang mga dinakpan giila nga mao sila si Reynaldo Si-It Atillo ,47 ug Reynante Cabije Tacatani, 36, nga gikonsiderar nga mga High Value Individual Regional Level ug anaa sa drug watch list.

Matud pa ni Taneo nga usa ka semanang gipanid-an ang illegal nga kalihokan sa duha. Giingong lapad ang lugar sa ilang negusyo.

Dugang pa ni Taneo nga si Tacatani maoy motawag ni Atillo kung adunay mga transaksyon ug mohatud sa mga shabu sa ilang mga parokyano nga mo order.

Matud ni Atillo nga sugod bulan sa Hunyo nagsugod siya sa maong illegal nga negusyo ug makadaghan na nga higayon siya maghatud og mga drugas ug suholan lang siya sa mosugo kaniya og tag P3 mil ngadto sa P5 mil matag transaksyon.

Giingong gikan sa kakunsabong piniriso diha sa sud sa Cebu City Jail ang shabu nga gibaligya sa duha. /IBM (BANATNEWS)