Nagpanikad sa distance learning

CEBU, Philippines — Malampuson ang unang adlaw sa distance learning sa mga publikong tunghaan sa Cebu City kagahapong adlawa gawas lang sa mga ginagmay nga problema bahin sa distribusyon sa mga modules.

Natumong sab ang unang adlaw sa klase sa pagsaulog sa World Teacher’s Day nga nakadugang sa kahulogan ug kamabulokon sa ilang propesyon tungatunga ning pandemiya nga nakapausab sa ilang naandang pagtudlo.

Si DepEd-Cebu City schools division superintendent Dr. Rheamar Angtud miingon nga nakita niya ang gana sa mga magtutudlo sa ilang trabaho bisan pa man niining binag-ong pamaagi.

Si Edgar Flores, PTA president sa Zapatera National High School sa iyang bahin miingon nga bisan naa o wala kining pandemiya gipakita sa mga magtutudlo ang ilang pagbati para sa kaugmaon sa ilang mga tinun.

“With or without pandemic, the time that teachers’ spent to their students is immeasurable. Without teachers, other professions cannot exist without teachers. Thank you for figuring out how to go about distance learning,” matud ni  Flores. Samtang si Cebu City Public Schools Teachers Association(CCPSTA) president Remus Marinas miingon nga base sa ilang nadawat nga mga report malampuson ang unang adlaw sa klase.

Apan dunay pipila ka ginikanan nga wala makakuha sa modules tungod kay dihang gikuhaan sila og temperatura tag-as kini maong wala sila pasudlan tungod kay estriktong gipatuman ang health protocols.

DepEd-Cebu City assistant superintendent Danny Gudelosao miingon nga samtang malampuson ang tanang mga tunghaan, ang Vicente Rama Memorial National High School karon pa magsugod pagpanghatag sa mga modules, samtang kagahapon pa usab nakapanghatag ang elementarya niini.

Matud niya nadelatar kini tungod sa mga koreksyon sa pipila ka pahina sa modules. Hinuon matud niya di angay mabalaka tungod kay magpadayon ang pagpanghatag sa modular printed materials. The Freeman/IBM