Distance learning mosikad karon

CEBU, Philippines — Mosikad na karong  adlawa ang  mga klase sa pampublikong eskwelahan sa tibuok nasud nga labing unang higayon nga pinaagi sa distance learning ang pamaagi.

Suma pa sa regional director sa Department of Education (DepEd)-7 nga si Dr. Salustiano Jimenez nga han-ay na ang tanan ilabi na nga  naapud-apod na sa miaging mga adlaw ang modules sa mga tinun-an.

Suma pa ni Jimenez  sa dihang nahinabi sa Banat News kagahapon nga gawas sa modules , duna puy ubang tinun-an ang gipaagi sa programa sa radyo , telebisyon ug online ang ilang pagtuon. Apan matud pa niya nga ang kadaghanan mas nipili sa modular gumikan kay dili tanang lugar ang dunay kusog nga signal sa internet.

Gitataw hinuon sa regional director nga dili gyud malikayan ang mga ginagmay nga problema.

Suma pa niya nga tungod sa panahon sama sa pag-ulan , napanglantawan niya nga madelatar ang pagapud-apod sa laing hugna sa printed modules.

Nasayran nga dunay ubang lugar kun diin moagi pa og sapa ang mga magtutudlo ug madelatar ang ilang trabaho kun magsagobang sila og baha.

Apan gipahibalo ni Jimenez nga aduna gihan-ay nga mga alternatibong pamaagi kun pananglitan makasugat sila sa maong problema.

Sa Central Visayas , ang nagpa-enrol sa pampublikong tunghaan  karong tuiga niabot ngadto sa kapin sa 1,756,000  kumpara sa  kapin sa 1,700,000 nga tinun-an sa miaging  tuig. Sa pribadong tunghaan, adunay kapin sa 320,000 nga nagpa-enrol sa miaging tuig apan karong tuiga niabot nalang og kapin sa 181, 000.

Aminado si Jimenez nga duna pay ubang ginikanan nga wala pa kahukom nga pa-eskwelahon ang ilang anak busa nihatag ra sila og extension sa enrollment hangtud sa unang bahin sa Nobiyembre.

Samtang si DepEd-Cebu City schools superintendent Sr. Rhea Mar Angtud nipadayag  nga sa Siyudad sa Sugbo dunay kapin sa 209,000 ka tinun-an ang nagpa-enrol karong tuiga ug labaw  kini gikan sa target nga 170,000.

Sa miaging tuig dunay  dul-an sa 169,000 ka mga tinun-an nga nagpa-enrol ug gituohan nga ang dugang mga tinun-an nagagikan sila sa mga pribadong tunghaan.

Naka-duha ka hugna napud  ang pag-apod apod  nila  og modules. /IBM (BANATNEWS)