VM Rama miapelar para sa mga senior citizens

CEBU, Philippines — Miapelar si Cebu City Vice Mayor Michael Rama kagahapong adlawa nga matugotan ang mga senior citizen nga makagawas panahon sa Modified General Community Quarantine.

Suma pa sa bise mayor nga naluoy na siya sa mga katiguwangan nga wala na makagawas-gawas sa ilang mga panimalay. Samtang nalipay siyang bukas na ang mga simbahan apan nasubo siya nga dili gihapon makasulod ang mga senior citizen.

Ning bag-o gidid-an ang mga edaran nga makasulod sa mga sementeryo aron unta  makaduaw sa ilang mga minahal sa kinabuhi nga nipanaw na. Si Mayor Edgardo Labella sa sayo pa miingon nga kinahanglan kini aron paglikay nga ma-expose sa daghang tawo tungod sa peligrong mataptan sila sa COVID19 ang mga edaran. Gisuportahan ni Konsehal Joel Garganera, Deputy Chief Implementar sa Emergency Operations Center ang baruganan ni Labella ug miklaro nga wala tratara nga piniriso sa ilang balay ang mga senior citizens.

Giklaro sab niya nga wala gikwestyon ang kapabilidad sa mga senior citizen nga makapanginabuhi kondili ang risgo sa ilang kinabuhi kun sila matakboyan og Covid-19.

Matud ni Garganera, sa natala nga 673 nga namatay sa Covid-19 dinhi sa siyudad gikan sa pagsugod sa maong kaso hangtod karon sobra sa katunga niini 57.3 porsiyento mga senior citizens, ang uban di mga edaran apan masakiton. /IBM (BANATNEWS)