72 ka kaso nadugang sa CV
CEBU, Philippines — Ang Central Visayas nakatala og dugang 72 ka mga bag-ong kaso sa coronavirus disease (Covid-19 ) sa kataposang adlaw sa bulan sa Septiyembre.
Ang 12 niini gikan sa Cebu City, 10 sa Lapu-Lapu City, unom ang Mandaue ug 44 sa Probinsya sa Sugbo.
Kini ang hinungdan nga anaa sa 1, 469 ang active cases sa Central Visayas samtang ang total recoveries anaa sa 18, 201 human nga dunay 42 nga nadugang sa mga nangaayo sumala pa sa Department of Health Central Visayas.
Sa mga bag-ong nangaayo 13 ang sa Cebu City, tulo sa Lapu-Lapu City ug 26 ang sa Probinsya sa Sugbo.
Ang cumulative total sa Covid-19 sa region 7 anaa sa 20, 949 ug 1, 279 ang total nga namatay.
Ang Cebu City dunay 9, 993 total cases sa COVID-19 karon apan 380 lang niini ang active cases base gihapon sa report sa DOH-7.
Tungod sa nadugang nga 13 nga nangaayo miabot na og 8,940 ang nangaayo sa siyudad ug 673 ang nakalas.
Apan bisan paman sa maong kalambuan si Konsehal Joel Garganera, Deputy Chief Implementer of Inter-Agency Task Force(IATF) Emergency Operations Center (EOC) Cebu City nanawagan nga bisan og layo na og naabtan ang siyudad sa kampanya niini pagpakgang sa pagkatap sa Covid-19 ug dili gyud mahimong mokompiyansa.
Samtang ang Dakbayan sa Mandaue nakatala na karon og 2,015 nga nangaayosa pagsulod sa bulan sa Oktobre 2020 sumala pa sa post sa Facebook sa Public Information Office (PIO) sa maong dakbayan.
Sa katapusang adlaw sa bulan sa Septiyembre anaa na lamang sa 150 ang nagpabilin nga aktibong kaso gikan kini sa kinatibuk-ang gidaghanon nga 2,305 ka kompirmadong kaso sa talaan niini.—Decemay Padilla, Romeo T. Limpangog/IBM (BANATNEWS)
- Latest