Bise Mayor Rama nisugod na sa tigom alang sa Sinulog 2021

CEBU, Philippines — Misikad na kagahapon ang panagtigom ni Bise Mayor Michael Rama uban sa mga sakop sa Sinulog Foundation Inc. (SFI) ug ubang stakeholders isip preparasyon sa Sinulog 2021.

Molungtad hangtod sa September 30 ang nagkalain-lain nga panagtigom aron mapangandaman daan ang maong okasyon ilabi na nga dili pa maseguro kun naa pa ba o wala na ang pandemya sa unang bahin sunod tuig.

Ang maong klase nga mga panagtigom gitawag niya og “Marathon Sinulog Meetings” o MSM.

Matud pa niya nga duna pud siya’y ipatawag nga karaan niya nga mga tawo nga nakauban niya kaniadto sa pagdumala sa maong kalihokan.

Matud pa ni Rama nga dili pa gyud matag-an ang panahon hinungdan nga mag-andam lang sila og kalihokan nga mohaom sa panahon.

Matud pa sa bise mayor nga dili pa niya matino kun unsa kini nga mga kalihukan sanglit tukion pa kini sa uban nga stakeholders apan gipasalig niini nga pabiling ipatuman ang mga health protocols.

Sayo pa, gianunsyo ni Mayor Edgar Labella nga gitugyan na niya kang Rama ang pagdumala sa Sinulog.

Bahin usab sa relihiyosong kalihukan, gisugdan na usab ang preparasyon niini.

Una na nga gibutyag ni Cebu City Councilor Philip Zafra nga base sa una nila nga panagtigom kauban sa kaparian , ilaha una nga gihangyo ang dili taga Cebu City nga dili una modagsa sa novena masses  kun ugaling magpabilin pa ang pandemya karong Enero 2021.

Matud pa niya nga usa kini ka pamaagi nga mamentinar ang social distancing ug maseguro ang kaluwasan sa mga debotos tungod kay panahon sa quarantine, 50 percent lang sa kapasidad ang mahimong pasudlon sa simbahan. /MEL (BANATNEWS)