22 ka boatman sa Lapu- Lapu positibo sa COVID-19

CEBU, Philippines — Nikabat ngadto sa 22 ka boatman kinsa gipaubos sa swab test ang nagpositibo sa COVID-19.

Kini ang gikompirmar sa niaging adlaw ni Grace Carungay, pangulo sa City Epidemiological and Surveillance Unit sa Dakbayan sa Lapu-Lapu.  

Matud pa ni Carunggay nga sa 22 ka nagpositibo ang 19 niini naggikan sa Isla sa Olango ug ang tulo naggikan sa Barangay Maribago

Ang maong mga boatman ug island hopping operators nga nagpositibo sa COVID-19 ang kasamtangang gi-isolate diha sa Sta. Rosa Community Hospital nga nahimutang sa Isla sa Olango.

Ug ang uban kanila nga naggikan sa barangay sa mainland ang gipahimutang diha sa Lapu-Lapu City College isolation facility.

Giklaro ni Carunggay nga ilang gisugyot nga ipahimutang gyud diha sa isolation facility nga giandam sa siyudad ang mga nagpositibo tungod kay dili sila motugot sa home quarantine.                 

“Ataa karong gi-advice is no more home isolation, kinahanglan nga isulod sa facility o sa hospital ang maong mga pasyente bisan pa og asymptomatic aron gyud ma-contain nato ug dili sab mo-spread ngadto sa uban ang virus”, matud ni Carunggay.                             

Nunot niini, ang City Health Department sa maong dakbayan ang mopahigayon usab og contact tracing sa Isla sa Olango sa pag-ila niadtong mga close contact sa nagpositibo. /BDB (BANATNEWS)