Arce wala makugang sa viral video tali sa iyang sakop ug sa vendor

CEBU, Philippines — Ang hepe sa Cebu City Prevention, Restoration, Beautification, and Enhancement (PROBE) nga si Raquel Arce wala na makugang kalabot sa viral video niadtong Lunes diin daghan ang nisaway sa iyang mga sakop.

Ang mga sakop sa PROBE nakalalis kini og usa ambulant vendor diha sa gawas sa Cebu South Bus Terminal (CSBT).

Si Arce nipasangil nga klaro nga gipangandaman ang maong video ug nakasabot siya sa reaksiyon sa publiko.

Matud ni Arce nga dili kompleto ang gipakita nga viral video.

Sa nahisgutang viral video makita nga nakaengkwentro sa vendor ang staff sa PROBE diin nagbinitaray ang vendor ug sakop sa PROBE sa trolley ug nagkatag diha daplin sa karsada ang mga  prutas nga baligya niini.

Matud ni Arce nga ang maong babaye nga vendor nailhan nila nga si Soledad Cordova kinsa tulo kahigayon na nga gihangyo sa PROBE nga dili mamaligya diha sa maong dapit ilabi na nga dagsaan og mga tawo ang terminal ug kinahanglan ang hugot nga pagpatuman sa social distancing.

Si Arce nagkanayon nga gihangyo og tarong sa taga PROBE ang maong vendor apan mao kini ang unang nag-wild hinungdan nga nangatagak ang gipamaligya niini.

Si Arce nihangyo sa publiko nga dili dayon magpadala sa maong viral video ilabi na sa mga tawo nga wala masayod sa tibouk nga estorya niini.

Nasayran nga 400 ka vendors diha sa gawas sa CSBT ang taod-taod na nga wala tugoting maninda diha sa lugar isip pagpatuman sa health protocols.

Si Soledad kinsa sakop sa United Small Vendors Traders of Cebu City nipasangil nga gi-harass sila sa mga sakop sa PROBE ug gipangsakmit ang ilang mga baligya.

Matud ni Soledad nga niadtong Agosto 10, 2020 gipasaligan sila ni Mayor Edgardo Labella nga makabalik og paninda ug maghuwat lang sila sa stall, guidelines ug protocol sa siyudad tungod sa pandemiya karon.

Apan walay gihatag nga schedule kong kanos-a sila makabalik ug samtang nagpaabot nanikaysikay sila aron mabuhi ilabi na nga lisod ang ilang kahimtang karon tungod sa COVID-19.

Samtang si Labella nimando kang City Legal Officer Rey Gealon nga mohimo og imbestigasyon sa maong insidente ug ipatawag niya ang tanang nalambigit niini. Plano usab ni Labella nga paton-an ang posibilidad nga makatinda og balik ang ambulant vendors. — Decemay P. Padilla/BDB (BANATNEWS)