Mga musikero gihatagan og hinabang

CEBU, Philippines — Gisugdan na kagahapon sa kagamhanan sa Dakbayan sa Sugbo ang pag-apod- apod og ayuda ngadto sa mga musikero ug sa uban pa nga mga indibidwal sa events industry.

Nasayran nga niabot ngadto sa 2,000 ang nalakip sa listahan nga hatagan og ayuda.

Gianam-anam ang paghatag og 25 kilos nga bugas aron  mamentinar ang social distancing. 

Usa sa nag-organize niini mao ang banggiitang mag-aawit nga si Mary Therese Rigor kinsa nipadayag nga apektado usab kaayo ang events industry sa pandemiya.

“Louy intawon kaayo ang atong mga musikero, comedian, photographer, sound system provider ug uban pa. Nawad-an gyud sila og panginabuhian ug dako kaayo og tabang ang gihatag sa gobiyerno”, padayag ni Rigor.

Matud ni Rigor nga gawas sa nahatag nga bugas gitun-an karon mao ang  financial assistance alang sa mga sakop sa ilang industriya.

Sayo pa, si Cebu City Councilor Niña Mabatid niduso og resolusyon kabahin sa pagpahatag og ayuda sa mga musikero ug uban pa nga mga indibidwal sa events industry.

Nasayran nga tungod sa pandemiya  pipila ka buwan nanirado ang mga resto bar, resort uban pa nga establisamento nga maoy lugar sa mga musikero.

“Nalipay ko nga nakatabang ko nila. Ato silang ampingan kay kani sila nakahatag ni sila og  kadasig nato ug labaw sa tanan  garbo nato ni sila sa Sugno tungod sa ilang mga talent”,  matud ni Mabatid.  /BDB (BANATNEWS)