Tulo patay sa aksidente sa balamban

CEBU, Philippines — Tulo ka tawo ang nakalas human sa disgrasya sa kadalanan sa may National Highway, Barangay Buanoy, Lungsod sa Balamban, ala una kwarentay siete sa kadlawon niadtong adlaw nga Domingo, Septiyembre 20, 2020. Ang nakalas naila nga si Willaim Dominic Bendevel, 23anyos, Barangay Baliwagan; nagmaneho sa Meo nga motor ug ang mga sakay nga sila si Dane Sultan, 23anyos, ug Steve Son, 23 anyos, puros taga Barangay Aliwanay sa maong lungsod.

Samtang ang nagmaneho sa FUZO Wing Van mao si Renerio Remo, 46 anyos, taga Barangay Canduman, Mandaue City.

Matud pa ni Police Executive Master Sergeant Benedicto Bobilles, imbestigador sa Balamban Police Station, base sa initial nga imbestigasyon giingong ang 10 wheeler truck gikan sa Barangay Cantibas, mogawas unta sa National Highway dihang mao usab ang pag-agi sa motor nga gimaneho ni Bendevel.

Giingong naigo ang motor sa kilid nga bahin sa sakyanan, nga niresulta sa pagkalagpot sa mga sakay niini nga tulo samtang ang motor napasok sa ilalom sa sakyanan.

Sumala pa ni Bobilles, patay diha-diha dayon ang driver nga si Bendevel, samtang ang mga sakay niini nga si Sultan nadala pa sa Balamban Hospital, diin didto na kini namatay ug pagkahapon sa maong adlaw nakalas usab si Son sa usa sa mga tambalanan sa Dakbayan sa Sugbo.

Ang driver sa 10 wheeler nga si Remo, nagtingkagol na karon sa bilangguan ug gipaabot ang pagpasang-at ug tukma nga kaso nga reckless imprudence resulting in multiple homicide. /MEL (BANATNEWS)