Mga nasikop sa illegal nga drugas napasakaan na og kaso

CEBU, Philippines — Kasong kalapasan sa Section 5 ug 11 sa Republic Act 9165 ug illegal possession of firearms ang gipasaka batok sa mga dinakpan nga sila si Rolando Romeo alyas Lando, 32 anyos, manghod niini nga si Edward Romeo, 24 anyos ug Calvin Valdez, 42 anyos nga nakuhaan og pito ka kilong shabu nga mobalor og dul-an 50 milyones pesos.

Matod ni Cebu City Police Office Director Police Colonel Josefino Ligan nga ang mga dinakpan matod pa couriers sa drug group nga Rustico Ygot ug giingong mosalisi sab pagpamaligya og drugas.

Ang grupo ni Rustico Ygot nasikop sa miaging tuig diin 28 kilos sa shabu ang nakuha sa managlahing operasyon sa Cebu City ug Lungsod sa Consolacion diin nasikop ang live-in partner niini nga si Jocelyn “Joy” Encila.

Si Rolando Romeo kaduha naka-dispose og ginadiling drugas ning tuiga, ang una niadtong katapusang semana sa buwan sa Abril diin 9 kilos ang napalusot.

“Mao ni kumbaga soldiers of the ground mag-move sa iyahang mga epektos, naa siyay ipadala i-distribute through provinces Negros, Cebu City, Cebu and Bohol. The thing is si Rustico Ygot naa siyay tawo then kining tawo mao ni mo connect aning tulo nga maoy mosugo”, segun ni Col. Ligan

Subay niini si Col. Ligan makig-alayon sa Director sa Bureau of Correction aron maputol ang illegal nga kalihukan ni Ygot nga giingong sulod sa bilangguan ang transaksyon.

Giingon nga ang grupo ni Ygot maka-padala og 20 ngadto sa 30 kilos sa shabu gikan sa kaulohan paingon sa Cebu City ug ubang probinsiya. /MEL (BANATNEWS)