Mabatid gireklamo sa Ombudsman sa kanhi niya staff

CEBU, Philippines — Usa ka kanhi empleyado sa buhatan ni Cebu City Councilor Niña Mabatid ang nipasaka og reklamo batok sa konsehal tungod kay giingong gipabaligya siya og manok niini.

Si Roldan Delos Reyes, taga Barangay Pit-os, Dakbayan sa Sugbo nipadangat sa iyang reklamo ngadto sa Ombudsman.

Base sa iyang affidavit, giingong gipatrabaho siya sa pribadong negosyo ni Mabatid nga supak sa iyang kabubot-on.

Matud ni Delos Reyes nga panahon sa pandemiya gipatuman ang skeletal nga pamaagi sa trabaho sa buhatan ni Mabatid.

Ug nakugang siya gumikan kay gipatawag siya ni Mabatid ug gimandoan nga mamaligya og manok.

Si Delos Reyes nagkanayon nga ang maong mando ni Mabatid wala kini koneksiyon sa iyang trabaho diha sa city hall.

Kaniadto si Delos Reyes giingong nagtrabaho kini isip executive assistant 1 diha sa buhatan ni Mabatid.

Giingong ang sweldo lang gikan sa city hall ang iyang nadawat ug wala siya’y nadawat nga sweldo gikan kang Mabatid sa iyang serbisyo sa personal nga negosyo sa konsehal.

Si Delos Reyes nipasangil usab kang Mabatid nga nigamit sa ubang staff niini ug sakyanan sa city hall sa operasyon sa pagpamaligya og butane ug face shields.

Si Mabatid sa iyang bahin, nihimakak kini sa mga pasangil batok kaniya ug matud sa konsehal nga andam niyang atubangon ang maong reklamo nga gipasaka batok kaniya.

Si Mabatid nagkanayon nga nag-apod-apod siya og mga manok ngadto sa mga barangay isip livelihood program ug dili alang sa iyang kaugalingon.

Dugang ni Mabatid nga gitangtang niya sa serbisyo si Delos Reyes tungod kay ligoy kini sa iyang trabaho. /BDB (BANATNEWS)