MCPO nakahimo na og security plan alang sa pasko

CEBU, Philippines — Hingpit na nga nakahimo sa ilang security plan ang kapolisan sa Mandaue City Police Office (MCPO) isip pagpangandam batok sa kriminalidad niining nagkaduol na ang pagsaulog sa pasko.                                   

Si Police Colonel Jonathan Abella nibutyag nga gawas sa nagpadayon nga pagrekorida ug pagpatrolya diha sa kadalanan sa siyudad nakiglambigit usab sila sa mga establisamento nga naglakip sa mga mall aron kini mahatagan og seguridad. Ang mga tagdumala sa estblisamento giawhag nga mo-report dayon sa kapolisan kong ugaling adunay mahitabong krimen o aduna sila’y mabantayan nga mga tawo nga katahapan ang lihok diha sa ilang establisamento.

Si Abella nihatag usab kini ngadto sa mga security guard og hulaagway sa mga suspetsado sa pagpanulis sa J. Center Mall.

Matud ni Abella nga hangtud karon nagpabiling gawasnon pa ang mga suspetsado sa pagpanulis sa nahisgutang mall.

"Atong gihatag ang mga hulagway sa mga at large sa pagtulis sa J. Center Mall para mailhan pod ug maalerto sila kon ilang makita nga mosulod sa gibantayan nilang establsamento”, padayag ni Abella.                        

Dugang ni Abella nga samtang nagpabilin pang gawasnon ang maong grupo sa mga tulisan dako usab ang kahigayonan nga mohimo kini og susamang krimen. /BDB (BANATNEWS)