Visayan Electric magbutang og help desk sa kabarangayan
CEBU, Philippines — Gipasalig sa Visayan Electric nga tumanon nila ang mga hangyo sa konseho sa Dakbayan sa Sugbo.
Usa na niini ang pagbutang og mga help desk diha sa kabaranggayan aron dali ra nga matubag ang mga yangungo sa mga konsumidor.
Nasayran nga tungod sa pandemiya limitado na lang ang paglakaw sa mga tawo busa dako kaayo og tabang kon naa ra sa ilang doul ang help desk ug mahatagan og dinalian nga tubag ang ilang mga pangutana.
Gibutyag sa tigpamaba sa Visayan Electric Queenie Bronce nga makig-partner sila alang sa maong programa ngadto sa buhatan ni Sangguniang Kabataan Federation-Cebu City President Jessica Resch.
Lakip usab sa ilang pagahimuon ang laing hangyo sa konseho nga mohimo og mas labing sayon nga pamaagi sa pagbayad sa electric bill.
Gibutyag ni Bronce nga gitun-an pa sa ilang management ang maong hangyo aron makagama pa og han-ay nga payment scheme.
Sa pagka-karon gihingusgan usab sa Visayan Electric ang pagtubag sa ubang yango-yango diha sa social media ug 24 oras usab ang ilang serbisyo niini.
Ug aron mas mapalapad pa ang ilang pagpasabot sa katawhan aduna sila’y programa sa radyo sa dyLA matag Biyernes sa alas 9:00 hangtud sa alas 10:00 sa buntag. /BDB (BANATNEWS)
- Latest
