Construction workers positibo sa COVID-19

CEBU, Philippines — Pipila ka mga trabahante sa mga construction sites dinhi sa Dakbayan sa Sugbo ang napositibo sa novel coronavirus disease nga giakaalarma sa mga opisyales sa dakbayan.

Tungod niini, makigtagbo karong adlawa ang Emergency Operation Center nga pangulohan ni Konsehal Joel Garganera ang Deputy Chief Implementor sa mga tinugyanan sa Department of Public Works and Highways, City Engineering, ug Cebu Contractors Association aron tukion ang may kalabutan sa mga construction sites ug ilang mga trabahante.

Matud pa adunay upat ka construction workers ang nagpositibo sa maong sakit ug giingong ilang nakauban ang 126 ka close contacts. Sa gihimong swab testing sa 126 nigawas nga 16 niini ang positibo, 59 ang nag negatibo ug adunay 49 ang nagpaabot pa sa resulta sa ilang swab test.

Ang EOC gusto masayod sa ilang mga health and safety protocols nga gihimo public o private man nga construction firms apil na usab ang ilang kabutang diha sa trabahoan sanglit ang uban kanila dili taga Cebu City.

Padayon ang awhag ni Garganera sa tanan nga katawhan nga dili gihapon mokompiyansa ug padayon nga mosunod sa mga health protocols. /IBM (BANATNEWS)