28 Cebu Press Freedom Week gibuksan
CEBU, Philippines — Bisan pa og dunay pandemiya, hingpit nang gibuksan ang usa ka semana nga kalihukan sa 28th Cebu Press Freedom Week 2020 kagahapong adlawa.
Apan inay nga magparada ug magtapok-tapok alang sa us aka Santos nga Misa, wala nay parada ug ang gihimo mao nalang ang virtual nga Santos nga Misa nga gisaulog ni Fr. Jonathan Rubin nga nanukad sa Sto. Niño Parish sa Lungsod sa Medellin ug kini gi-broadcast live sa social media page nga gitambungan usa sa gatusan ka mga tawo online.
Una kining higayon sa Cebu Media nga gipaagi sa social media ang mga kalihokan tungod kini sa pandemiya.
Kaniadto daghang mga parties, mga forums, meetings, presentasyon ug uban pang kalihokan nga tapukan sa mga sakop sa The Freeman/Banat News; Sunstar/Superbalita; CDN ug KBP uban usab sa makabungog nga mga pa raffles.
Kung unsa ka bibo ang nanglabay nga katuigan mao usab kini ang kamingaw sa karon tungod sa nasinati nga pandemya. Matud pa ni Rubin, tungod sa pandemic ang kalibutan niurong ug walay tawong wala maapektahi.
“Sayod kitang tanan nga ang maong sakit nga Covid-19 wala pay tambal apan dili kita angay mawagtangan og paglaum tungod kay ang Ginoo maayo ug puno sa gugma ug kalooy,” matud pang Rubin.
Sumala pa ni Rubin, samtang magsaulog sa usa ka semana nga kalihukan sa Press Freedom week iyang gipahinumduman ang mga tawong nagtrabaho sa media industry nga ang tinuod nga kagawasan dili lang ang pagbuhat sa imong kagustohan kung dili ang kagawasan nga maayo ug makapahimuot sa Ginoo.
Ang Cebu Press Freedom Week saulogon tumong sa semana diin nga handumon ang September 21, 1972 nga pagdeklarar sa Martial Law nga miipit ug mipahilom sa mga sakop sa media.
Ang Cebu media nanawagan sa katawhan nga suportahan ang gawasnong pagpadayag ilabi na karong panahon nga dunay pandemiya sanglit mas gikinahanglan karon sa publiko ang tukma ug hustong impormasyon./IBM (BANATNEWS)
- Latest