P61.3 milyones Shabu, usa patay sa drugbusts

CEBU, Philippines — Mokabat sa P61.370 milyones nga balor sa illegal nga drugas ang nasakmit Police Regional Office 7 sa duha ka managlahing buybust operation kagahapon sa kaadlawon Septiyembre 20, 2020 diin usa ang nakalas ug tulo ang nangadakpan.

Napatay sa mga sakop sa Provincial Drug Enforcement Unit ug Regional Drug Enforcement Group 7 alas 12:20 Domingo sa kaadlawon ang high value individual sa Sibulan, Negros Oriental nga si Joemarie Yongco alyas Joe, 26 nga taga Urban Phase 4, Lot 9, Block 18 barangay Rizal San Carlos City Negros Occidental.

Nakuhaan og kapin sa duha ka kilong shabu nga mokantidad ang tanan sa P13,770,000 si Yongco.

Niananang Alas 7:45 Domingo sa buntag nasikop sab sa gipahigayon nga buy bust operation ang tulo ka mga lalake diha sa Sitio Tipolo Bridge sa dalan  Andres Abellana Extension sa barangay Guadalupe sa Siyudad sa Sugbo.

Ang mga dinakpan mao silang Rolando Ondoy Romeo alyas Lando, 32, manghod niini nga si Edward Ondoy Romeo, 24, ug Calvin Hermoso Valdez, 42, pulos molupyo sa maong lugar.

Si Police Colonel Josefino Ligan ug Police Major Randy Caballes ang hepe sa City Intelligence Unit inabagan sa Regional Intelligence Divison  maoy nangulo sa maong operasyon.

Nasakmit gikan sa tulo ang pito dagkong putos nga Chinese tea bags nga dunay tagsa ka kilong gituohang shabu nga mokantidad og kapin sa P46.7 milyones.

Matod ni Caballes duha ka buwan nilang gipanid-an ang mga suspek human sila nakadawat og mga impormasyon nga nalambigit ang grupo sa pagpamaligya og illegal nga drugas.

Dihang nakompirmar ang ilang kalihokan gilusad dayon ang buybust operation kagahapon. Gituohan nga mga sakop sa Ygot Drug Group ang tulo. Ang maong sindikato giingong usa sa mga dagkong grupong nagpadagan og negosyo sa illegal nga drugas sa dakbayan ug lalawigan sa Sugbo.

Lakip sa nakuha gikan kanila ang boodle money nga P1.6 milyon isip buy bust money ug ang maroon nga Toyota vios nga adunay plate number GEC 8759 nga gipanag iya sa usa ka nurse nga nagtrabaho sa usa ka publikong tambalanan sa dakbayan. Giingong gikan pa sa San Carlos City, Negros Occidental ang maong illegal nga drugas ug gisakay kini’g barko paingon sa siyudad sa Toledo ug kini si Lando mao ang misugat niini sa pantalan.

Nakapangalan ang maong kontrabando kang Rustico Repuela Ygot alyas Dikoy nga nabilanggo na sa Zamboanga Penal Farm human madakpan sa mga sakop sa Philippine Drug Enforcement Agency- 7 niadtong Mayo 18, 2010 ug na kombikto niadtong Hulyo 25, 2013.

Matud pa ni Lando nga makaduha pa sila nakabaligya sa gipadala kanilang shabu. Ang una niadtong unang semana sa Abril 2020 atol nga pagpaubos sa enhanced community quarantine tibuok isla sa Sugbo.

Matud niini 9 kilong shabu ang ilang na-deliver sa siyudad ug lalawigan sa Sugbo lakip na sa probinsya sa Bohol.

“Wala mi kahibawo kinsa ang tag-iya ana kay igo lang man namo na ihatud kung asa na siya ipahatud sa nagtawag. Wala gani ko kahibawo unsa diay na, natingala ko nga nakahibawo siya sa akong number,” matud pa ni Rolando Romeo sa dihang gipanguta kini ni Cebu City Mayor Edgardo Labella nga miadto sab sa dapit human sa pagkasikop sa tulo.

Matud sa mayor kung wala pa masakmit ang maong illegal nga drugas daghang utok ang mangadaot.

“Kadaghang utok mangaguba ani dong kadaghang kaugmaon ang madaot,” matud pa sa mayor ngadto sa mga dinakpan.

 “I would like to commend also the police Colonel Ligan, General Ferro nga despite the kining atong focus sa pakigbugno sa pandemic, salamat sa Ginoo nga sa ilang paningkamot uban sa mga barangay officials mi flatten ang atong curve. But at the same time dili sad nato kalimtan that there is another battle that’s going on,  this illegal drugs. That’s why we commend the police,” matud sa mayor.

Si Police Brigadier General Albert Ignatius Ferro ang hepe sa Police Regional Office 7 nagkanayon nga gikan sa gawas sa nasud ang maong mga shabu tungod sa packaging niini nga gisulod sa Chinese tea bags.

Matud niya nga gikan sa Golden Triangle nga nagbase sa nasud sa Myanmar ang maong drugas.

 “The problem of Cebu is very porous, there’s a lot of entry points. They could use the legal transport system to bring this kind of contrabands,” matud sa heneral. /IBM (BANATNEWS)