Unom ka barangay sa Daanbantayan gideklarang drug cleared
CEBU, Philippines — Unom ka Barangay sa Lungsod sa Daanbantayan ang gideklarar sa Philippine Drug Enforcement Agency (PDEA)-7 nga drug cleared base sa post diha sa social media page sa lungsod.
Ang nahisgutang mga barangay gilangkuban sa Calape, Dalingding, Logon, Pajo, Tinubdan ug Tominjao.
Ang nahisgutang unom ka barangay nakadawat kini og certification gikan sa Region VII Oversight Committee nga gipanggulohan ni PDEA-7 Director Levi S. Ortiz uban ang mga sakop niini nga ahensiya sa gobiyerno nga gilangkuban sa Department of the Interior and Local Government (DILG), Philippine National Police (PNP), Department of Health (DOH) ug Cebu Provincial Government.
Sa wala pa ideklara nga drug free ang maong mga barangay nipahigayon una og deliberasyon ang committee pagpiho nga walay supply sa illegal nga drugas, walay ilegal nga kalihukan ug walay drug laboratory ug chemical warehouse ang mga barangay.
Lakip usab nga gitan-aw sa maong mga barangay ang presensiya sa pagpananom og marijuana, drug den, drug pusher ug user.
Adunay barometro usab nga gipatuman alang sa Barangay Clearing Program nga angayang sundon alang sa ilang drug cleared status sama sa pag-activate sa ilang Anti-Drug Abuse Council (BADAC), implementasyon sa community-based rehabilitation for drug surrenderee, active involvement of barangay officials sa mga anti-drug activities, ug active involvement sa Sangguniang Kabataan alang sa pagtabang sa pagmentinar sa drug liberated status sa barangay ug ang existence sa drug awareness, preventive education and information programs. /BDB (BANATNEWS)
- Latest