ETT sa Consolacion nagpadayon

CEBU, Philippines — Nagpadayon karon sa ilang expanded targeted testing (ETT) ang lokal nga kagamhanan sa Lungsod  sa Consolacion diin ubos kini sa pagpasiugda sa buhatan  sa municipal health office (MHO)  sa maong lungsod.

Matud ni Dr. Fe  Pardillo, municipal  health officer  sa lungsod nga subay sa nagpadayon nilang ETT nga gipahigayon  ilang namatikdan ang pagsaka usab sa kaso sa nagpositibo sa  COVID-19.

Naglakip sa ilang gipaubos  sa swab test  ang mga kawani  sa kagamhanan sa lungsod, mga barangay workers, kapolisan, kabomberohan, jail officers ug health workers.

Matud ni Pardillo nga niabot ngadto sa 972 ang gidaghanon sa mga empleyado nga napaubos nila sa swab test.

Ang kadaghanan sa mga nagpositibo mga asymptomatic o mga walay sintomas sa COVID-19 .

Gipasabot ni Pardillo ang kamahinungdanon sa pagsunod sa gipatuman nga health protocols nga naglakip sa pagsul-ob og face mask, social distancing ug ang pagpanghunaw kanunay og tubig gamit ang sabon o alcohol.

Sa nasayran nga  ilang gisugdan  ang unang hugna sa targeted testing niadtong  Septiyembre 11, 2020  diin nikabat ngadto sa 500 ka empleyado sa lungsod ang ilang na-swab test.

Tumong sa kagamhanan sa lungsod nga mahimo na unyang COVID-19 free ang tana nilang kawani. /BDB (BANATNEWS)