300 ka contact tracers i-hire sa Lapu-Lapu
CEBU, Philippines — Gitinguha karon sa kagamhanan sa Dakbayan sa Lapu-Lapu ang pag-hire og 300 ka contact tracers kinsa maoy idestino ngadto sa 30 ka barangay nga naglakip sa 11 sa Isla sa Olango ug 19 sa mainland sa maong dakbayan.
Ang maong gidaghanon nga contact tracer sa dili pa idestino sa pagsugod sa ilang trabaho ang ipaubos sa mga pagbansaybansay sa pagsiguro nga mahimo silang epektibo sa pagtuman niini.
Si Mayor Junard Ahong Chan nagkanayon nga ang maong mga contact tracer maoy tahasan sa pag-ila sa nagpositibo kaniadto sa COVID-19 pinaagi sa pagbisita niini sa ilang mga panimalay.
Gitinguha sa siyudad nga mga gradwado sa kurso nga medical o criminology ang makuha nilang contact tracer tungod kay gituohan nila nga epektibo kini sa itahas nga trabaho.
Ang ma-hire nga contact tracer adunay madawat nga binuwan nga sweldo gikan sa kagamhanan sa siyudad ug hatagan usab sila sa ilang mga gikinahanglang gamit sa pagpahigayon sa ilang trabaho. /BDB (BANATNEWS)
- Latest