Toneladang basura nakuha atol sa coastal clean-up
CEBU, Philippines — Gipahigayon kagahapon ang hiniusa nga pagpanglimpyo sa kadagatan ug kasapaan sa Sugbo subay sa kasaulogan sa ika-35th International Coastal Clean-up nga giapilan sa mga lokal nga opisyal, kabarangayan ug simbahan.
Sila si Mayor Edgardo Labella, Bise Mayor Michael Rama, mga sakop sa konseho ug Archbishop Jose Palma nitambong sa nahisgutang kalihukan diha sa South Road Properties (SRP). Si Labella nagpasalamat sa kooperasyon sa tanan ug malaumon nga magpadayon ang panaghiusa aron mahimo usab nga disease free ang Sugbo.
Samtang si Kapitan Clifford Jude Niñal sa San Nicolas Proper nagkanayon nga sayo sa buntag nagtinabangay sila sa paglimpiyo diin nakahipos sila og duha ka dagkong truck sa mga basura gikan sa kasapaan.
Samtang ang pangulo sa Department of Public Service Atty. Jigo Dacua nibutyag nga ang ilang eco-warriors sa Cebu City nakakolekta og 163.15 tons sa mga basura atol sa gipahigayon nga International Coastal Clean-up.
Subay niini, Si Mayor Junard Ahong Chan uban sa pipila ka kawani sa Dakbayan sa Lapu-Lapu nisalmot usab sa nahisgutang kalihukan sanglit pagpangandam usab kini sa pagbukas og balik sa turismo sa siyudad.
Lakip sa nisalmot sa pagpanglimpiyo sa kadagatan sa siyudad mao ang SCUBASURERO o underwater clean-up nga nagdala sa ilang tema nga “Balik Turismo: Kadagatan-Limpyuhan” .
Lakip sa niapil sa pagpalimpiyo ang Lapu-Lapu City Tourism Cultural and Historical Affairs Commission nga ubos sa pagpangulo ni Cindi King-Chan.
Si Eddie Llamedo, hepe sa Department of Environment and Natural Resources (DENR)-7 Planning and Management Division nagkanayon nga pinili lang nga individual nga naglakip sa mga personnel sa lokal nga kagamhanan ug pipila ka pribadong buhatan ang gitugotan nga makaapil sa kalihokan. Romeo T. Limpangog/BDB (BANATNEWS)
- Latest
