Mosimba diha sa Santa Teres de Avila sa Talisay ipaubos sa inspection

CEBU, Philippines — Ipaubos una sa inspection ang mga tawo nga buot motambong sa mga misa diha sa Santa Teresa de Avila Parish sa Barangay Poblacion.

Kini maoy gipahibawo ni Police Major Gerard Ace Pelare, hepe sa Talisay City Police Station.

Gilauman nga ang mga Santos nga Misa dagsaon sa mga tawo samtang nagsingabot ang kapistahan sa patrona sa siyudad nga si Santa Teresa de Avila.

Ang opisyales sa siyudad ug kadagkoan sa simbahan nangandam na niini aron dili malapas ang mga health protocol nga gipatuman.

Ang gitugotan nga gidaghanon sa manimbahay nga makasulod sa simbahan 366 lang samtang 100 lang usab ang diha sa gawas nga bahin.

Ang mga senior citizen magkinahanglan nga mokuha og special pass gikan sa ilang barangay sa dili pa makatambong sa misa.

Samtang ang mga menor de edad padayon nga dili tugotan nga makasuroy o bisan pa sa pagtambong sa misa.

Matud ni Pelare nga sa dili pa makasulod sa compound ang mga tawo moagi una sila og inspection pagsuta kong lakip ba sila sa mga tawo nga gitugotan nga makatambong sa Santos nga Misa.

Ang siyudad magsaulog sa tinuig nga kapistahan ni Santa Terese de Avila matag Oktubre 15. /BDB (BANATNEWS)