Island hopping sa Lapu-Lapu hugot mopatuman sa protocols

CEBU, Philippines — Aron mamonitor paspas ang paghimo og contact tracing, gimando sa Dakbayan sa Lapu-Lapu nga tanang mga  turistang mag island-hopping kinahanglan adto lang pagsakay ug pagkanaug sa tulo ka mga pantalan sa dakbayan.

Si  Atty. Airlee Tejano, executive secretary ni Mayor Junard ‘Ahong’ Chan miingon nga kining maong mga pantalan mao ang Kontiki Port sa Barangay Marigondon, Hilton Wharf sa Barangay Punta Engaño ug Angasil Port sa Barangay Mactan.

Gihimo kini aron pagsiguro nga mapatuman gayod ang health ug safety protocols nga gilatid sa kagamhanan  sa maong dakbayan nunot niining pandemiya sa novel coronavirus disease (COVID-19).

Ang chairperson sa City Tourism, Cultural, Historical Affairs Commission (TCHAC) nga si Cindi King Chan nakigtigom na usab sa mga stakeholders isip kabahin sa gihimo nilang pagpangandam sa pagbukas na og balik sa turismo sa dakbayan.

Sa Section 10  sa giluwatan nga Executive Order (EO) ni Chan, ubos sa modified general community quarantine (MGCQ) gitugotan na ang pagbiyahe sa kadagatan  apan alang lamang sa tourism activities. /IBM (BANATNEWS)