35 ka kawani sa Lapu-Lapu gi-drug test, duha positibo

CEBU, Philippines — Gipaubos sa kinalit nga drug test ang 35 ka sakop sa Team Marshall sa Dakbayan sa Lapu-Lapu diin duha niini ang nagpositibo sa paggamit og ginadiling drugas.

Si Gary Lao, head sa City of Lapu-Lapu Office of Substance  Abuse Prevention (CLOSAP) nagkanayon nga ilang gihimo ang pagpaubos og balik sa random drug test diin mahimo nilang bakwion ang giluwatan nilang certification nga nag-ila sa mga buhatan nga drug free sa nilabay nga mga bulan.

Ang maong mga kawani gipatawag kini alang sa usa ka tigom ug pagkatapok nila gipahigayon ang drug test.

Si Mayor Junard Ahong Chan nibutyag nga giawhag niya ang CLOSAP nga mopahigayon og random drug test sa mga buhatan sa kagamhanan sa dakbayan human sila makadawat og mga report nga pipila sa mga kawani ang namalik na usab sa paggamit og ilegal nga drugas.

Si Chan nagkanayon nga ang duha ka nagpositibo mao kadtong mga kawani nga nakatapos na sa unom ka bulan nga rehabilitation program sa kagamhanan sa siyudad.

Hinuon ipaubos pa sa confirmatory test ang maong duha ka kawani ug kon magpositibo gihapon posibleng dili na gyud sila makabalik sa ilang trabaho.

Sa laing bahin, nasikop atol sa gipahigayong buy bust operation sa City Intelligence Unit sa Cebu City Police Office pinangulohan ni Police Major Randy Caballes ang usa ka 48-anyos nga lalaki niadtong Huwebes sa gabii diha sa Balaga Drive, Barangay Labangon, Dakbayan sa Sugbo.

Ang suspetsado giila sa kapolisan nga si Dante Desoyo, residente sa maong lugar, nalakip sa regional drug watch list isip high value individual.

Nasakmit gikan kang Desoyo ang mga pinutos nga ginadiling drugas nga nitimbang tanan ngadto sa 50 gramos ug nibalor sa P340 mil.

Matud ni Caballes nga ang area of distribution ni Desoyo naglakip sa A. Lopez Street, Barangay Calamba, Barangay Labangon ug Punta Princesa. Rowena D. Capistrano/BDB (BANATNEWS)