PDEA-7: Pagbantay sa pekeng mga operatiba

CEBU, Philippines — Gipasidan-an sa Philippine Drug Enforcement Agency 7 ang publiko bahin aning bag-ong modus operandi sa mga armadong tawo nga magpakaaron-ingnong ilang mga ahente apan hulidap o tulis diay ilang tuyo.

Ang buhatan sa PDEA-7 nakadawat og mga reports may kalabutan sa pipila ka mga indibiduwal nga gidakop sa mga nagpailang sakop sa PDEA-7 ug gidala sa mingaw nga lugar apan gitulis ug gipanguha ang ilang mga butang.

Ang PDEA niawhag sa katawhan nga kung aduna silay masugatan nga magpailang taga PDEA nga mohimo og anti-illegal drug operations nga pangitaan gyud sila og PDEA ID ug PDEA badge. Tan-awon sab kun duna silay kaubang representante gikan sa media ug elected official sa ilang barangay tungod kay ingon niini sila mo-operate subay sa balaod.

Gipahibalo sa buhatan sa PDEA nga tanan nilang anti-illegal drug operations nga naglangkob sa paghimo og imbentaryo sa mga ebidensiya diha mismo sa lugar diin nahitabo ang pagdakop ug kini saksihan sa media ug lokal nga opisyal  subay sa mga probisyon sa Republic Act 9165.

Kun wala gani niini, giawhag nila ang katawhan nga motaho gilayon sa maong insidente sa pinakaduol nga police station o motawag sa PDEA RO VII o sa telepono 09226893786.

Nadakpan

Sa laing bahin,  nasikop sa buybust operation sa Station Drug Enforcement Unit  sa Mambaling Police Station pinangulohan ni Police Captain Francis Renz Talosig alas 5:30 Merkules sa hapon didto sa  Sitio Alaska Proper, Brgy. Mambaling, Syudad sa Sugbo ang usa ka Cristian Telero Aniñon alyas “Makoy’ 19. Si Aniñon gikonsiderar nga high value individual sa rehiyon  ug naa sa drug watchlist. Matud pa ni Talosig nga kapin sa semana nilang gimonitor ang illegal nga kalihokan ni Aniñon una pa gihimo ang operasyon.

Ang suspek mi mitug-an nga naa sa prisohan ang iyang kontak nga maoy mogiya kun asa mokuha sa mga drugas. Nakuha gikan kaniya ang 143 gramos nga mobalor P972,400 base sa Dangerous Drug Board Value (DDB).

Kapuyo sa rob-suspect

Sa pikas bahin, gidakop sa kapolisan ang kapuyo sa kanhi suspetsado sa pagpanulis sa usa ka mall sa Mandaue City kinsa bag-ohay lang sab gipusil patay human nakapiyansa sa maong kaso. Ang gisikop mao si Ailyn Gilbero, 42, taga Barangay Bong-Bong sa Ozamis City base sa warrant of arrest gikan ni Judge Edmund Pintac sa RTC Branch 15 sa Ozamis City niadtong hunyo 5, 2017 tungod sa kaso sa ilegal nga drugas. Si Gilbero mao ang kapuyo ni Juvilyn Terante kinsa sayo ning semanaha nakagawas sa prisohan human nakapiyansa. Nagkuyog pa silang duha sa dihang kalit silang gihunongan og sakyanan ug duha sa mga sakay niini ang mipatay kang Terante.

Pagkasayod sa Ozamis City police sa nahitabo kang Terante ug nabalita si Gilbero gipahibalo dayon ang kapolisan dinhi sa Sugbo nga duna kini warrant of arrest maong gidakop  Miyerkules sa hapon Septiyembre 16, 2020 diha sa Barangay Banilad sa Dakbayan sa Mandaue. Romeo Marantal/IBM (BANATNEWS)