Way nadugang nakalas
CEBU, Philippines — Ang siyudad sa Sugbo, Mandaue, Lapu-Lapu ingon man ang Cebu Province wala’y natala nga bag-ong nangamatay sa novel coronavirus disease(COVID)-2019 niadtong Martes, Septiyembre 15, 2020 base sa datos sa Department of Health Central Visayas.
Sumala pa nga nagpabilin ang gidaghanon sa mga nakalas gikan sa maong sakit sa Cebu City, Mandaue City, Lapu-Lapu City ug Cebu Province naa sa 662, 127, 92, ug 328.
Apan sa mga bag-ong natala nga nadugang nga mga kaso, ang Cebu City nakatala og 29 hinungdan ang siyudad aduna karoy 9, 778 total cases sa COVID-19 apan 316 lamang niini ang active cases.
Samtang ang gidaghanon sa mga nangaayo moabot na karon og 8,800 human nga adunay 68 nga nadugang nianang adlawa.
Makita sab sa data sa DOH-7 nga ang Mandaue City dunay 2, 338 total cases sa COVID-19 diin 247 niini ang active cases, pito sab ang natala sa ilaha nga bag-ong kao sa COVID-19 sa maong adlaw. Samtang 1,946 sab ang total recoveries human niadtong Martes adunay 10 ka mga recoveries ang nadugang sa siyudad.
Ang Lapu-Lapu City dunay 2,260 total cases sa COVID-19 ug 190 niini ang active cases, nakatala sab sila og unom ka bag-ong kaso base sa datos sa DOH-7.
Naa na sa 1,978 ang ilang total recoveries diin tulo niini ang bag-ong nadugang.
Sa pikas bahin, ang Cebu Province aduna nay 5,111 ang total cases ug naa sa 582 ang active cases human nakatala og dugang 52 ka mga bag-ong kaso niadtong Martes. Ang total recoveries nila naa sa 4,201 diin siyam niini ang bag-o.
Sa datos sa DOH-7 niadtong Martes ang tibuok Central Visayas aduna nay kinatibuk-ang 19,898 ka mga kaso ug 1,485 niini ang active cases samtang mokabat na 17,194 ang total recoveries ug 1,219 ang total reported deaths. /IBM (BANATNEWS)
- Latest
