Luag sa social distancing sud sa pasaheroan di irekomendar

Cebu, Philippines — Dili irekomendar sa Department of Health Central Visayas  kining planong mas luag nga physical distancing sa mga pasahero sulod sa mga pampublikong pasaheroan dinhi sa Sugbo.

Sumala pa ni Dr. Mary Jean Loreche, tigpamaba sa DOH-7 dili tukma ang 0.75 meter distance gikan sa usa ka metro nga maoy gustong mahitabo karon sa Department of Transportation  tungod sa kakuwangon sa masakyan sa mga tawo.

Dugang pa ni Loreche, kung tinguha sa Sugbo nga makab-ot ang tinguhang mabuntog sa hingpit o pakontrol ang pagkaap sa Covid-19, kinahanglang ipabilin ang status quo.

Gitug-an ni Loreche, tingali maoy gibasihan sa lakang ang facemask ug face shields sa mga pasahero maong wala na gikinahanglan ang usa ka metro nga distansya.

Si Cebu City Mayor Edgar Labella miangkon nga dako og natampo ang sektor sa transportasyon sa ekonomiya sa dakbayan.

Mao kini ang rason nga gipahulma niya ang adhoc committee aron mosusi sa bag-ong sistema sa transportasyon karong panahon sa pandemiya.

Nitambong ang mayor sa tigom kahahapon  uban ang mga representante sa Land Transportation Franchising and Regulatory Board, Department of Transportation, Cebu City Transportation Office, Metro Cebu Development and Coordinating Board, Councilor Joel Garganera ug uban pang stakeholders.

Nahisgotan didto ang posibilidad nga dugangan ang rota alang sa mga local public transport nga magbiyahe sa kadalanan sa siyudad sama sa Bus Rapid Transit (BRT) ug modern PUJs nga maoy kasamtangan nga gipadagan karon.

Nasayran nga  adunay tulo ka mga transport cooperatives nga nag -operate karon nga nagpadagan sa 93 ka modern PUJs. (BANAT NEWS)