Kapolisan sa Consolacion nagpatrolya na sa coastal areas
CEBU, Philippines — Gibalik na sa kapolisan sa Lungsod sa Consolacion ang ilang naandan nga pagpatrolya sa kabarangayan nga naglakip sa mga coastal areas.
Si Police Major Verniño Noserale nga maoy hepe sa Consolacion Police Station miingon nga sukad sa pagpatuman sa quarantine status nga nagsugod niadtong Marso 2020 wa na nila mapatuman ang ilang pagpatrolya sa daplin sa kadagatan.
Suma pa niya nga nasentro ang ilang pagtagad sa paghatag og seguridad sa mga boarder control points aron pagpugong sa pagkatap sa COVID-19.
Nagkanayon si Noserale, karon nga ubos na sa modified general community quarantine (MGCQ) ang maong lungsod ila na usab nga mapadayon ang naandan nilang gihimo sa pagpakigbatok sa ubang krimen.
Hinoon gitug-an ni Noserale nga dihang gipatuman ang lockdown, ang mga molopyo dali usab nga makataho ngadto sa ilang buhatan sa mga tawo nga mosulod sa ilang lugar sakay sa pumpboat nga dunay katahapan nga lihok.
Ang mga barangay nga nahimutang sa daplin sa kadagatan nga higpit nilang gibantayan mao ang Barangay Tayud nga gawas sa gihimo nilang coastal inspection gihimo usab sa kapolisan ang pagpaubos sa anti-drug seminar sa mga molopyo ug mananagat sa nahisgutang dapit. /MEL (BANATNEWS)
- Latest