Bantayan Airport buksan karong tuiga
CEBU, Philippines — Buksan na ang Bantayan Island Airport sa amihanang bahin sa Lalawigan sa Sugbo karong tuiga.
Kini ang gipahibawo sa Department of Transportation human sa gihimong inspeksiyon sa proyekto niadtong Sabado.
Si Mactan-Cebu International Airport Authority (MCIAA) General Manager Steve Dicdican ang nangulo sa inspection team aron pagsusi sa kalambuan sa nagpadayong pag-ugmad sa Bantayan Island Airport.
Nasuta nga 50 porsyento na nga kompleto ang Bantayan Island Airport, matud sa DOTr.
Ang kaugmaran naglakip sa paglugway sa runway nga anaa na sa 70 porsyento samtang ang perimeter fence anaa na sa 30 porsyento ang nahuman.
Matud ni Dicdican nga ang proyekto mas sayo pa nga mahuman sa gikatakda niining petsa sa Disyembre 2020. “Bantayan is indeed a beautiful place, so we have to make our airport beautiful as well,” matud ni Dicdican.
Atol sa pagbisita ni Dicdican sa lugar niadtong Agosto 7 iyang gipahibawo nga humanon ang proyekto sa Nobiyembre aron mainugurahan kini sa Disyembre.
Niadtong Septiyembre 2019, ang MCIAA ug kagamhanan sa Lalawigan sa Sugbo nagkauyon nga ugmaron ang tugpahanan isip commercial air hub.
Kini nahimutang sa 29 ektarya nga luna sa probinsiya sa Lungsod sa Sta. Fe.
Ang MCIAA ang niugmad sa proyekto base sa standards sa Civil Aviation Authority of the Philippines (CAAP) nga naglakip sa P94.4 milyones nga pagpataas ug pagsemento sa runway ug kapin sa P3 milyones nga kaugmaran sa terminal. /MEL (BANATNEWS)
- Latest